يعني ايه كلمة ( وطن )

من أجمل الجمل التي قرأتها في حياتي جملة تقول : لا ينتسب الإنسان إلى أرض ليس له تحت ترابها موتى .

الجملة تأملتها كثيرا فوجدتها تحمل في معانيها الكثير والكثير رغم قلة كلماتها

وسألت نفسي .. يعني إيه كلمة وطن ؟

وهذا السؤال على ما أذكر تم طرحه في أحد الأفلام أو إن السؤال نفسه أغنية .. لا أستطيع التحديد .

المهم .. هذا السؤال ألح على ذهني كثيرا .. يعني إيه كلمة وطن ؟

يعني أرض وشوارع وشوية حجارة وآثار

ولا الوطن هو الأهل والآباء والأجداد والأصدقاء وأينما كانوا كان الوطن .

اكتشفت إن كلمة وطن كلمة كبيرة أوي ومعناها أكبر وأعظم من مجرد كلمات توصفه

الوطن هو مشاعر وأحاسيس وأرض لنا فيها ذكريات جميلة وذكريات مؤلمة .. الوطن على أرضه الأباء والأشقاء والأصدقاء وتحت ترابه الأجداد ..

قد نشعر بالظلم في أوطاننا وقد نشعر بأننا غرباء فيه .. فنبتعد ونهجر بحثا عن الأمان وعن حضن يكون لنا فيه مأوى ... لكنه ليس كحضن الوطن وإن شعرنا بالأمان .

حتى ونحن في الأحضان الغريبة وإن كنا سعداء وإن كنا شعرنا بالأمان ... لكن يظل حضن الوطن ينادينا بداخلنا .. فيلازمنا شعور بالحنين الدائم .. لأيام الطفولة والصبا .. لأحلى ذكريات وإن كانت مريرة .

وتحت وطأة شعورنا بالحنين الدائم نفقد أحيانا شعورنا بدفء الأحضان الغريبة .
حتى وإن كان كل الأهل حولنا وكل الأصدقاء ... فإننا أيضا نشعر بحنين لتراب دفن فيه أعز ما لدينا

ده باختصار كلمة وطن ..


منذ أيام قليلة أحسست بهذا المعنى فسطرت ما شعرت به في صورة خاطرة

ـــــــــــــــــــــــــــــــــــ

بحبك وحاسك بحبك وشايفك
صبية جميلة في ليلة عرسها
بحبك وحبك ملكني واخدني
من فرحة زماني وفرحة ليالي
في البعد عنك انا عشتها
بحبك صدقيني واسأليني
ليه بعدت عنك
هربت وسافرت وهاجرت
لما شوفت أسوة صحابك
اعذريني وافهميني يا نن العين
في البعد عنك صدقيني
قلبي دايب م الحنين
في حضنك صحابي واهلي وناسي
في حضنك حبيبتي اللي كانت
في حضتك كل عمري وذكرياتي
وف حضنك كان يوم ميلادي
في حضنك قدري وفرحة شبابي
فاكره يا حبيبتي ليالي السمر
وهمسي لنيلك في ليلة سهر
فاكره جنوني في نهارك وليللك
وكل كلام الهوى اللي قولته
في شمسك وقمرك .. في نيلك في بحرك
فاكره دموعي في ليلة وداعك
يومها قولت راجع مش مسافر
بس بعدت عنك لما شوفت
كل خاين وكل غادر
نفسي يا حبيبتي يبقى في حضنك
كل المخلصين
اللي ضحوا واللي صحوا
جواكِ الضمير
واللي حارب واللي عبر
ولاجلك هد الجبال
صدقيني يا حبيبتي انتِ ملك دول
نفسي ربي يبعد عنك
كل آسي وكل ناسي
فضلك عليه
يومها ها ارجع لحضنك واضمك
واقولك يا حبيبتي اعذريني
بحبك وجوا حضنك نفسي احكي
نفسي اشكي نفسي افضفض
نفسي اقول
عمري ما انسى يا حبيبتي حنانك عليا
ليلة بكايا على اغلى ما ليا
بس ليه الحزن شايفه في ملامحك
وفي جمالك
لسه فاكر يا حبيبتي ليالي الحسين
وذكرى أول لقا في ليالي الحنين
جوا مني دمعة وصرخة وفرحة
وغنوة لسومه وحليم
بس عمري ما قولت فات الميعاد
ولا عمري ها اقول جبار
لسه فاكر يا حبيبتي
ليالي العيد ولمسة إيد
لسه الامل يا حبيبتي جوا مني
لسه بحلم بالهنا وبالأمان
بس خايف يا حبيبتي
يوم رجوعي حاسس اني
مش هالاقي في حضنك مكان